Rotonde-graf

Weeromme naor Verhaelen
Weeromme naor Stellingwarfs
Home


Rotonde-graf

Vandeweke vreug iene mi'j, a’k wel es heurd hadde van een 'rotonde-graf'. Now, daor hoefde ik niet zolange over nao te daenken. Nee vanzels, wel van een rotonde-karke, mar ik har nog nooit van een rotonde-graf heurd. Now, zee de man, dat is et verschil tussen et tal auto's dat een rotonde wel oprit mar d'r neffens de ciefers nooit weer ofreden is. En die moe’n dus argens midden op de rotonde op iene grote bulte onder et zaand liggen. Now, en dan zullen in de meerste van die rotonde-graf-auto's ok nog wel pattie meensken zitten, vulde ik kwaanskwies an.

We hebben doe een schoffien tegen mekeer anzeurd over hoe et toch meugelik is dat d'r op die wieze zomar auto’s verdwienen, die toch nargens mist wodden. D’r moet deur de jaoren henne toch es een rood laampien branen gaon wezen bi’j de Rieksdienst veur et wegverkeer in Veendam of zo. En d’r moe’n toch pattie vrouw- of manluden wezen die nog de hieltied met et eten klaorzitten te waachten. We kwammen tot et oordiel dat et missen van die auto's oons nog wel an wol, mar dat de meensken die as daor meugelik nog inzatten, ok weg weren zonder dat daor rochtberhied an geven is, dat wol oons eins niet an.

Meerstentieds riede ik mien autogien netties tussen de witte strepies deur naor et plak waor ak wezen moet. Mar een inkelde keer riede ik ok wel es een aentien as een wildeman. In de vremde wil 't bevobbeld nog wel es et geval da'k links veursorteerd stao en dan toch rechtdeur of zels hielendal naor rechts ofslao. Eersomme gebeurt mi’j lieke vaeke vanzels. Dan is't krek a’k mien riebewies in Peries of misschien slimmer nog, in Rome haeld hebbe. Kotleden mos ik even in Hollaand wezen veur een praotien en opiens ha'k de truuk van et rotonde-graf deur. Et gebeurde mi'j weer. Ik ston bi’j een rood stoplocht veuran in de baene om rechtsof te slaon. Opiens zie'k op een verhipt klein bottien da'k toch rechtdeur moete. Doe mien locht veur rechtsof op gruun sprong bin mar opreden en ok mar gewoon rechtuut gaon. D’r was op disse krusing gelokkig gien fotokamera te bekennen die mi’j op een prentien flitste!

Inienend gong d'r in mien hassenpanne een laampien branen. Aj' je netties gedregen in 't verkeer, dan ried ie vaeke precies over van die deteksielussen, die in de weg votstopt binnen. Zoe'n lusse die elke auto vernemt en ‘m vaeks ok nog telt. Aj' wat roeg rieden en de bochten een betien ofsnieden of juust slim roem nemen, dan hej' lichtkaans daj' krek niet over zoe'n lusse henne rieden en dan tel'ie dus niet mit. Ak' dus netties naor Amsterdam toeriede en riedend as een beest weer terogge kom, dan daenken ze bi'j Riekswaeterstaot grif, da'k nog de hieltied in 't Hollaanse bin.

Laeter he'k mien ogen nog es even goed de kost geven en is et mi'j now al vaeke opvalen dat pattie van die detektielussen op de reerste plakken in de weg liggen. Hiel vaeke aj' een oprit van de snelweg op, of een ofrit van zoe'n weg ofrieden, ziej' dat die lusse krek in dat stokkien van de bocht ligt wat as ik dus vaeke ofsniede. Tegenwoordig maek ik d'r zels een sport van. De hieltied perberen die lussen te ontwieken. Want ik wil niet altied telt wodden! En ja, ik maeke die baentiesmannegies mar wat graeg een betien in de war. Ik bin trouwes ok al es een sjefeur tegenkommen die krek et tegenoverstelde dee, dus et maekt heur eins ok nog niks uut.

Op een rotonde doe'k et now steevaaste. Ik riede de rotonde altied twie hiele ronden omme veurda'k mien ofslag neme. Bi'j elk rontien daenk ik dan even an al die auto's mit al die meensken d'r nog in, die daor in 't midden van de rotonde op iene grote bulte onder et zaand liggen. Hielendal alliend en zonder ok mar een vliege kwaod te doen,  leg ik d’r dan weer een stok of wat auto’s bi’j. Die wodden dan weer zonder rouwadverteensie in de kraante, bi’jteld in heur rotonde-graf.


© Piet/er Bult