Schieve-woonders

Weeromme naor Verhaelen
Weeromme naor Stellingwarfs
Home


Schieve-woonders

Bi'j mien beste weten wonen d'r gien meensken in de Ooldehove van Liwadden of in de toren van Pisa. En toch bleken d'r neffes de kraante meensken te wezen die schieve wonen! Grondverzakkings, dom of te goedkoop bouwd of zokswat, dat kan ’k mi'j allegere nog wel veurstellen. Mar nee heur, 't gong over huurders en eigeners van een huus, die te goedkoop wonen. En aj' dan dus neffens die geleerde heren te goedkoop wonen, dan bi'j een schieve-woonder. Zokke woorden en zokke malle idenen, kun allienig mar deur echte baentiesmannen bedocht wodden vanzels.

't Schient zo te wezen daj' wonen moeten naor daj' inkommen hebben. Aj' wat meer verdienen gaon dan moej' dus deurstromen naor een duurder huus. Aj' es een min jaor hebben dan moej' weer wat kleiners betrekken. Rare boel vanzels. Mien inkommen, en mientes vaaste niet allienig, verschilt nog al es van jaor tot jaor. Dat wodt dan elk jaor verplicht verhuzen bin'k bange. Now en as ze dat dan onder kontrole hebben dan gaon ze vanzels weer een stappien wieder en moe'n de auto, de fiets en wat al niet ok anpast wodden an 't inkommen. Femilie en buren om je henne moe’n ok de hieltied inruild wodden veur een soorte dat meer bi’j je inkommen past. Wat mi’j wel anstaon zol is dat et tal van dat soorte van baentiesmannen anpast wodden zol an mien inkommen. Dan zo’k wel hiel zunig verdienen wilen.

Neffens mi’j dri’jt et vaeke om et verbloemen van heur eigen tekotkommings. De hoge heren rekenen uut hoevule van een bepaold soort huus d’r op een plak bouwd wodden meugen. Daorbi’j gaon ze graeg uut van et minste in tal en et meerste in pries. Gewoon, (te) dure wonings dus mar wel bedoeld veur de sociaole buurt. Een peer jaor laeter bliekt dan vaeke dat de meensken die daor ienkeer wonen, mar niet verhuzen willen - deurstromen willen - naor nog duurdere huzen. Now ja, ze willen misschien wel mar de polsstok is vaeks krek even te kot veur pattie meensken. En van die witte schimmelwieken - mit de leuze: hoge sprongen, lege buidels - bin d’r ok al genoeg van. En zoas meerstal bedaenken ze dan een zuuite verpakking veur een zoere inhoold: “schieve-woonders”, en krigt de gewone man weer es de schuld van al heur misrekens.

’t Zol trouwes een mooie boel wodden aj’ elk jaor opni’j van alles bi’jstellen moeten naor je inkomsten. Buten et verplicht inruilen van de auto moej’ een ankem jaor dus verplicht zes keer buten de deure uut eten in stee van now die vier keer. Et jaor daorop een tillevisie mit een bield-buize van twie-en-vuuftig centimeter in plak van de drie-en-zestig centimeter briedbield. De twiede-haans winkelties zollen d’r wel bi’j veren donkt mi’j. Mit een goeie administraosie en dus nog wat meer meensken op ’t gemientehuus, kun ze disse zaeken misschien nog wel an, mar hoe komt et mit oonze vri’je tied? Meugen we wel lieke vaeke biljatten en hoeveul uren kraantelezen heurt bi’j duzend euro in de maond? Meugen we nog wel liekeveule naodaenken as veurig jaor of moe’n we dat dan ok minderen of juust ...? ‘k Zol d’r wis wat muuite mit hebben.

En hoe daenken ze dan over de vrouwgies en de mannegies zels? Kuj’ wel gewoon schieve bi’j iene in huus blieven die wat meer of wat minder verdient? Of moe’we mit mekeer elk jaor ommezien naor een aandere schoonhied? Komt daor dan ok een twiede-haans winkeltien veur? Want d’r is vanzels vrouwvolk mit een klein gat mar ze bin d’r ok mit een flink gat in de haand. Mit een betien gelok kom ik op disse wieze niet meer an warken - en dus inkomsten - toe. Ik blieve dan dus krek as now trouwes, gewoon een aarme sloeber. Mar wel een aarme sloeber die hielendal niet deurstromen of verhuzen wil, omreden ik in Ni’jberkoop aorig naor ’t zin wone.


© Piet/er Bult