Spullegies en borrelties

Weeromme naor Verhaelen
Weeromme naor Stellingwarfs
Home


Spullegies en borrelties

Veurige weke vul mien oge op een foldertien waor onder eren een damspul in anprezen wodde waorvan de schieven bestonnen uut glaezen reumelties. In et foldertien wodden de spulriegels niet hielendal uut de doeken daon, dus he’k daor mar es een schoffien mit ‘in de hangmatte’ legen. Een gewoon damspul wodt speuld mit elk twintig schieven. De uutdaeger speult mit twintig witte stienen en de verdediger mit twintig zwatten. Dět spullegien dammen begint mit et daelezetten van de glaezen schieven op et bod en die moej’ dan eerst volgieten mit een draankien van ’t ien of  ’t aander. Mien eerste gedaachte was vanzels: de witten volgieten mit ’n mooie jonge klaore en de zwatten mit zaachte, wat zuuite zwattebessejenever.

’t Schient ok een protte veur te kommen dat d’r klaoverjast wodt om een borreltien. De kaorten bin dan niet van glas vanzels, mar d’r wodt deur de verliezers een borrel weggeven an de winners. Meerstentieds nemen de verliezers d’r dan zels ok geliek een borreltien bi’j om heur tekotkommings in aarmoede weg te drinken. Now weet ik alliend niet of ze bi’j elk spullegien een borrel nemen of dat et bi’j elk boompien daon wodt. Op iene aovend wodden d’r zomar drie boompies speuld van elk zestien spullegies. Dat zollen achtenveertig borrelties de man wodden! Dat liekt mi’j stark. De meersten zollen zoe’n aovend niet overleven daenk’. Iene borrel de boom liekt mi’j ok niet veur de haand liggen, of ’t moet al in ’t bejaordehuus wezen. Wat is klaoverjassen en toegelieke drinken, toch alderheistelikst muuilik.

As wi’j thuus es mit oons beidend een pottien dammen, dan kuwwe ok zat drie potties op een aovend an. De echte dammers doen d’r meerstal wat langer over he’k wel es heurd, mar wi’j speulen zat drieje op een aovend. Awwe now bi’j elk pottien van winnen, verliezen of een geliekspul een borreltien drinken dan geleuf ik niet da’k zoe’n aovend dronken wodde. Hoe zol’t kommen awwe iene drinken, elke keer awwe een stien van de tegenstaander ofpakt hebben? As de aander hielendal gien stienen meer het dan hej’ dus ok al een twintig borrelties op. Drie spullegies op een aovend, dat red’ik -krekliek as mit klaoverjassen- dus ok mit dammen bi’jlangenao niet. Dammen en toegelieke drinken liekt mi’j dus ok mar niks.

Doe’k toch in mien hangmatte lag, he’k ok drekt mar wat van disse spulriegels (of bin’t drinkriegels?) bedocht bi’j ’t schaeken. Schaeken schient meer een spullegien te wezen veur de wat hogere heren en hoge heren hebben vaeks ok wel wat mit drinken en beklinken. Dat zodoende. Bi’j et schaeken bruuk ie acht stokken en acht pionnegies he’k mi’j vertellen laoten. Now is’t ok zo daj’ bi’j ‘t schaeken niet al je stokken kwiet wezen hoeven om toch verleuren te hebben. De iene keer staoj’ al nao vuuf zetten ‘mat’ en een aandere keer kan’t wel een peer uren duren veurdaj’ wunnen of verleuren hebben. En dat winnen of verliezen het niks te maeken mit et tal stokken waj’ nog over hebben. Ien perbleem vanzels: et schaekspul schient nog al ingewikkeld te wezen. Dat glaswark uut de folder is dus niet an mi’j besteed.

Wi’j hebben now veur oonszels een spullegien bedocht, ok mit glaswark en zo, da’k elke aovend wel speulen wil. ‘k Wol d’r eins wel vaast wark van hebben. Ik doe de gedienen in de kaemer stief dichte en dri’j de verwaarming wat hoger. Ik haele oons een flesse uut de kelder en pak d’r twie reumelties bi’j uut de diggelkaaste. Dan zet ik een mooi meziekplaetien op, stikke d’r een keersien bi’j an en dan vraog ik of ze gezellig bi’j mi’j op de baank zitten komt. ‘k Schink heur en mi’jzels een borreltien in en dat doe’k de hiele aovend zo om’t ure. Ie zien et, de spulriegels bin ienvooldig. Et warkelike spullegien kan wel de hiele naachtuut duren en ’t aorige is dat dit spullegien gien verliezer kent. ’n Echte anraoder dus!


© Piet/er Bult