Thriller

Weeromme naor Verhaelen
Weeromme naor Stellingwarfs
Home


Thriller (anzet)

[ Vandaege he'k et eerste heufdstok van wat ooit lichtkaans wel es een thriller wodden kunnen zol in de komputer stopt. In dat eerste heufdstok maek ik de lezers drekt al beheurlik ni'jsgierig. Wat zol dit wodden moeten? Waor zol dit op uutdri'jen? Mar as iene et ooit lezen zal... We zien et wel. Ik hebbe d'r in ieder geval wel nocht an en gao d'r mit deur... ]

Heufdstok I, Naojaorskuier

"Gaoj' morgenvroeg mit et veld in?" zee de (k)oolde Kikkervanger tegen mi'j, "Et is iene van de laeste mooie daegen van dit jaor moej' mar rekenen en ik moet veur de Warkgroep nog een laeste tellingroute lopen over 'e Delleboersterheide.
"Now, dat liekt mi'j wel wat toe. Hoe laete moe'k klaorstaon?"
"Et zol mooi wezen awwe d'r tegen et morgenlochten weren kunnen want dan zie'we misschien nog krek dat naachtdieren heur daor weerommetrekken in de beschutting en dat de dagdieren teveurschien kommen. Een ure of zeuven hael ik je wel an."

Aanderemorgens krek om zeuven ure stopt de terreinwaegen van de oolde Kikkervanger bi'j mi'j op 'e uutrit.
"Hej' wel een opschriefboekien en een penne of potlood bi'j je? vragt de beste man, krek a'k instappen wil.
"Ik hebbe mien 'onderweg-weej’-mar-nooit-ontmoetings-tassien' altied bi'j me en daor zit altied vanalles in tot wel an een GSM-megien en kondoompies an toe."

Nao roem een ketier rieden dri'jt de Kikkervanger zien bakbeest van een auto et parkeer-plak op waor - an de sporen te zien -  vandemorgen nog niet eerder iene west het. Van et parkeerplak tot op 'e heide kon 'k nog krek even een piepe opstikken. Op 'e heide rook ie niet, dat heurt niet zo. Even laeter leupen we et vaaste pad wat de Kikkervanger altied lopt as zien 'monitor-route'. Al nao een peer menuten blift hi'j stokstief stille staon.
"Ik leuve da'k wat zie." zegt hi'j. Kalman dot hi'j nog een tree of wat naor veuren om beter zien te kunnen wat daor onder een struke ligt. De schrik slat oons allebeidend om et hatte awwe uutvienen dat daor gien beest ligt, nee, et liekt wel een meenske! Slimmer nog, et is een meenske of beter zegd, et was een meenske, want zo te zien zat d'r gien leven meer in en lag ze - et was een maegien - hier ok al een mooi schoffien.

"Now hewwe ok wat omhanen. Wat doe'we? Zuwwe deurlopen en krek doen awwe niks zien hebben of moe'we de pelisie d'r bi'j haelen?"
"Mi'j liekt, dat laeste want kiek, as iene oons toevallig zien het dan het et lichtkaans dat wi'j d'r op ankeken wodden." Naodawwe d'r nog wat omhenne lopen en keken hadden haelde ik mien GSM-megien uut et 'onderweg-weej’-mar-nooit-ontmoetings-tassien’ en drokte twiekeer op de iene en ienkeer op de twieje. Ik keek nog es naor de Kikkervanger en vreug a'k bellen zol of da'k et niet doen zol... Hi'j nikte van 'ja', toe mar.
"Mit de regiopelisie. Wat kan ik veur jow doen?"
"Now veur mi'j niet zo hiel vule en veur dat maegien dat hier ligt ok niet al tevule meer mar ik wol d'r even melding van maeken van d'r een lichem van - zo te zien - een dood maegien onder een struke op 'e heide ligt."

[ Geheuge-steuntien: Naoda'k in de tussenliggende heufdstokken een protte stokkies schrieve over 'snelwegsex op de heide' zol in et laeste heufdstok uutkommen moeten dat de oolde Kikkervan-ger mi'j eins misbruukt het veur een alibi mar dat hi'jzels et maegien eerder al, ommebrocht het. Et kan ok nog veraanderen en dan moet et wodden dat ik et maegien van kaant maekt hebbe omreden zi'j mi'j mittroond naor de heide, niet wetende dat ik eins niks van vrouwluden weten wil. (Ok niet vergeten: riegelmaotig een 'flashback' naor et verleden te bruken.) ]


© Piet/er Bult