Twiede jeugd

Weeromme naor Verhaelen
Weeromme naor Stellingwarfs
Home


Twiede jeugd

Ze was nog mar krek 45 jaor, mar kreeg wel een hatanval en mos in zeuven haosten naor et ziekenhuus. Et was een zwaore anval. Op 'e opperaosietaofel kreeg ze opiens een "haost dood" ervering. Doe ze God 'zag' vreug ze die:
"Zit mien tied d'r now al op?"
"Nee heur," zee God "ie hebben nog 43 jaor, 3 maonden en 9 daegen te leven."

Doe et weer wat beter mit heur gong, besleut ze om dan toch mar een face-lift doen te laoten, leut ok drekt hier en daor wat vet vothaelen en de bosten en nog wat aandere hangplakken weer wat in medel brengen. Ze leut et haor ok nog mar es weer een betien bi'jkleuren, de tanen wat bleken en gao zo mar deur. Ze maekte dan ok nog hiel wat ni'je toekomstplannen veur heurzels.

Doe ze de laeste keer nao alle behaandelings uut et ziekenhuus kwam en de weg over leup, wodde ze liekwels mit een hadde klap overreden deur een auto en kwam daor alderdeegst bi'j omme. Doe ze even laeter - mar now in warkelikhied - veur God ston, keek ze die es strak in de ogen en zee:
"Ie bin mi'j ok een mooien iene. Ie zeden da'k nog roem 43 jaor te leven hadde, en ie haelen mi'j now toch al op? Haj' mi'j niet waorschouwen kund, doe die auto de bocht omme kwam?"

"Och meenske, bin ie et," gaf God as bescheid "mar ik weerkende toch je hielemaole niet!"…


© Piet/er Bult