Veurzitter

Weeromme naor Verhaelen
Weeromme naor Stellingwarfs
Home


Veurzitter

In ieder dörp is vaeks wel zoe’n mannegien bekend: altied en overal veur klaorstaon. Voetballen, körfballen, de ies-, dam- en schaekklup, niks is disse man te vule. Et duurt dan ok niet al te lange dat de beste man keuzen wodt as veurzitter van et Plaetselik Belang.

Et eerste jaor gaot et nog wel goed en staot hi’j pal veur de belangen van ‘zien’ dörp. D’r moet eins een dit kommen en d’r moet eins dat gebeuren.

Et twiede jaor wodt et al wat minder want hi’j wodde op et Gemientehuus al es een peer keer aorig in de watten legd, gong al es mit de Wethoolder te diketen en kreeg alder-deegst ok al es wat vergoeding uut de algemiene middels. Op de naojaorvergeerdering van Plaetselik Belang vun hi’j de meerste vraogestellers uut et dörp al haost wat mierkerds en keek hi’j hoe langer hoe vaeker op zien gelosie. Macht smaekt zuuite en naor meer…

Et dadde jaor dat de beste man veurzitter was van Plaetselik Belang koj’ in zien praot de Wethoolder haost an ’t woord heuren. Een protte mooie lege woorden mar gien daoden of et mos et hoe langer hoe dikker woddende verslag van de vergeerdering al wezen. Mar dat wodde uutwarkt deur ‘zien’ siktaoris.

Et vierde jaor is de veurzitter verhuusd naor een witte schimmelwiek in et Heufdplak van de Gemiente. Eerst was hi’j nog fraktieveurzitter van de grootste perti’j.

Now is hi’j Wethoolder mit o.e. sport en kultuur in zien pottefulie. Et Plaetselik Belang van zien oolde dörpien moet niet altied zo zeuren over de oolde kantine: alle keren as et lekte het de Gemiente et dak toch rippereerd, now dan...


© Piet/er Bult