Vuuftig jaor leden

Weeromme naor Verhaelen
Weeromme naor Stellingwarfs
Home


Vuuftig jaor leden...

- Moeke, ma'k t’aovend naor Slager toe te daansen?

- Och maegien, daor bi'j' now eins nog wat te jong veur.
   Ie bin nog mar zestien, ik zol nog mar een peer jaor waachten.

- Ae, moeke, toe now. Jannie mag ok en Hennie en Triensje.

- Now, dan moe'we dommiet onder 't eten, pappe mar es vraogen.
   Mar es heuren wat die d'r van zegd.

(...)

Moeke staot bi'j 't aanrecht en onder et eerpelschellen, et toemaeken van de appelsmotse en et braoden van een dun repien spek op et pietereulielochien, valen moeke de ogen haost wat dichte as ze een aentien vot droomt, en daenkt an heur eerste daansaovend bi'j Slager. Ze wet et nog hiel goed, krek al was 't gister. Op heur verjaordag hadde ze doe heur eerste pettikoot kregen en drie daegen naotied moch ze van heur oolden veur et eerst te daansen naor Slager. Ze hadde d'r trouwens ok weken omme zeuren moeten, mar ja, de tieden weren doe ok aanders. Heur moeke hadde heur doe wel tien keer waorschouwd veur de jonges: ... en as ze je an de knopies van je bloesien zitten dan geef ie ze mar een tik over de vingers, har moeke heur wel tien keer zegd. Pas goed op veur de jongen!
Hoezo, 'pas goed op veur de jongen', hadde ze doe docht, ze gong toch te daansen! Ja, en dat daor ok jonges kwammen dat was toch niet zo vremd? Hoezo, 'pas goed op veur de jongen'. Mar ja, de tieden weren doe aanders...

(...)

Onder et eten keek ze heur moeke al es an mit een blik in de ogen van: toe now moeke, vraog et now an pappe, toe now. Mar moeke zocht nog om de goeie vraoge, want ja, hi'j was een man van weinig woorden en zels was ze d'r eins ok nog niet hielemaole an toe. Heur kleine maegien hielemaole alliend naor 't daansen, en dan mit al die jonges daore. Och, een gezellige aovend op schoele, dat was nog daor an toe. Daor weren de meesters en de juffers. Die keken d'r wel op toe, mar op zaoterdagaovend naor Slager te daansen…

Ze waachtte tot de laeste leepvol soepengrotten bri'j:
- Wat daenk ie..., oons maegien wil t’aovend eins graeg naor Slager te daansen. Wat daenk ie?

- Watte...? naor Slager toe te daansen? Daor komt niks van in, ze is nog vusen te jong!

- Ae, pappe toe now. Jannie mag ok en Hennie en Triensje.

- Die bin allemaole vule groter as ieje.
   Ie bin nog vusen te jong!
   Ik moet now naor de stal.
   De gruppe moet nog leeg en mit Jantje 13 zal et haost wezen...

(...)

Onder et ofwasken perbeerde ze et nog een keer:
- toe moeke, alderliefste moeke, toe, mag et now?
   Ik zal hiel goed oppassen en je alle daegen helpen mit ofwasken.
   Toe now moeke, ae toe...

(...)

Moeke kon heur lieve maegien niet weerstaon, et gong an. En wat wil now et geval. Ik hebbe die beide hier krek ok al an 't daansen zien, de vonken spatterden d'r of! Moeke... en heur kleine maegien. Beide de aovend van heur leven, mar d'r is ien groot verschil mit doedestieds, mit de jaoren vuuftig: moeke daanst nog mit heur éérste man...!


© Piet/er Bult

In 2008 orgeniseerde ik tegere met Henk de Vries een peer daans- en meziekaovens in Noordwolde...