Leestekens
Weeromme naor Essays
Weeromme naor Stellingwarfs
Home
Leestekens
Et is vaeks een kwessie van smaek mar d'r wodt wel gauw es zegd dat d'r
in gewone schrieveri'je vaeke wat te min leestekens bruukt wodden. In
een gedicht wo'n d'r vaeks hielemaole gien leestekens bruukt en dat
hoeft meerstal ok niet. Mit heufd- en kleine letters stikt et in een
gedicht vaeks ok al niet iens zo nauw. De schriever mag et hielemaole
zels weten, het de vri’je haand.
In een bepaolde opsomming wodt de komma meerstal bruukt as
scheidingsteken, bi'jglieks in et veurbeeld: een protte lanen, volken
en stammen. Aj' die lanen, volken en stammen mit naodrok schrieven
willen dan bruuk ie gien komma mar iederkeer et voegwoortien 'en': een
protte lanen en volken en stammen. Et kan nog slimmer en dan wodt et:
een protte lanen en een protte volken en een protte stammen. Disse
laeste vorm wodt in de biebelteksten riekelik vaeke bruukt. Naost de
komma as scheidingsteken in een opsomming wodt de komma trouwens ok
vaeke bruukt as rustpunt bi'j et lezen.
We hebben et al es eerder nuumd, voegwoorden, bi'jwoorden en leestekens
kun seins slim van belang wezen, bi'jglieks een komma meer of minder in
dit veurbeeld uut 1 Samuël 8:16 "Jim beste slaven en slavinnen en jim
starkste warkhulpen zal hi'j jim ofnemen om ze veur himzels warken te
laoten, krek as jim ezels." of mit iene ekstra komma (an ’t aende):
"Jim beste slaven en slavinnen en jim starkste warkhulpen zal hi'j jim
ofnemen om ze veur himzels warken te laoten, krek as jim, ezels."
Kiek now es goed naor die alderlaeste komma in "krek as jim [,] ezels."... Ien zoe'n stomme komma, mar wat een verschil in tekst en betekenisse!
Ik geleuf et, ikke niet...
© Piet/er Bult